CARCAGNUTI

Sono riuscito finalmente a mettere in rete il mio sito.

Tutti i materiali di " I Carcagnuti" e tanto altro ancora li potete trovare a questo indirizzo.

www.frasqui.com

A guccia a guccia,
s’inchjia ru mari!

A megghjia parola
è chira c'u ssi dicia!

A ra cazzunaggina
u cc’è rimediu!

A ragiuni è di fissa
e ru tuartu è di cornuti!

A malerva u mora mai!

Attacca u ciucciu
duvi vo ru patrùni!

Cchiù d'avuta è ra muntagna
e cchiù carrica ra nivi!

Chini nescia tundu
u mora quatru!

Chini pratica ccu ru zuoppu,
all’annu zoppia puru!

Chini si nzura
è cuntientu nu juarnu!

Chini ammazza ru puorcu
è cuntientu tuttu l’annu!

Si l’amicu cchiù caru u tti saluta
E u tt’è rimastu mancu nu parenti.
Comporta… c’u ffà nenti
Ancora ud’è furnuta
Pua diri ch’è furnuta veramenti
Ca n’cuaddru t’è cadutu u mundu sanu
Quandu passi vicinu a nnu pizzenti
E nnu tti stenda mancu a manu.

Chista mi l'ha ditta a vvuci Giancarlu.

Pirsunaggi

Cannalivari
Corajisima (a mugghjieri)
Nutaru
Mascarati

Cannalivari canta e ri mascarati rispundanu abballando a tarantella.

CANNALIVARI
Sugnu cannalivari gruassu e grassu
E ri cavuzi li puartu a zumpafuassu;
Manciu... [...]

Prisenti…

E’difficili leìri u dialettu,
è difficili aru parrari,
è difficili aru capiri:
a cchi serva?

Succeda ca i paroli,
perdano siansu.
Succeda ca “urzulu”
u vvo diri nenti.

Ca pua serva ad ancuna cosa,
sapiri cchi d’è l’”urzulu”?
A nua ni serva u ‘nglesi,
ppi d’arrivari ara fini i du misi!

L’”urzulu” lassamulu stari,
è cosa ppi chini u tena nenti cchi fari.
I cosi vecchi u servano a nenti,
su sulu cosi a manu i di pizzenti.

E’ veru chi paroli su nicissari
Ppi mantiniri i custumanzi nuastri
Ma ia di l’usanzi cchi mmi nd'haju fari,
sa ra panza u cci puazzu dari a manciari.

Ia sugnu u prisenti,
u mmi puazzu ntricari i du passatu.
- Ccu l’acqua passata u macina ru mulinu!-

Passatu…

- Aprili fa ru jiuri e majiu nd'ha l’onuri! -

I paroli tenanu l’anima.
U ssu sulu nu mbruagghju i vucali e littiri.
Ti si mai dimandatu cchi ssu i paroli?
I paroli su fatti, su pirzuni, su cosi:
tu parri e ri paroli disegnanu u mundu chi teni intr’a capu.
Nu mundu chjaru, pricisu, cuami ti piacia a ttia.
Pirzunaggi, strati, fatti  ninni e fatti randi,
su paroli, e ccu ri paroli cci damu vita.
E cchi fussa mai u mundu senza paroli:
i paroli cadano,
si mucanu cumi i pampini i l’arvulu
ca però, sempri, torna ggjigghjiaa.
Chini u sa quanti paroli su caduti,
chini u sa duvi su gghjuti a finiri l’animi i di cosi:
forzi aru paradisu i di paroli…
ma chiri paroli ca su caduti,
sind’hanu purtatu ccu d’iddri
l’anima i di cosi ca arripprisintavanu.
E’ ddi su modu ca sindi vanu i civiltà!

U mundu sindi vadi a rumbuluni,
u ssi canuscia cchjiù l'uamini buani.
U cc'èspiranza ca vutamu arriati,
e puru c'u vulimu, simu ntricati.

E ssi percasu cerchi i ti scansari,
u cc'è piriculu ca ti pò sarvari.
Aru mundu i di fissa tu si natu,
e nnu cc'è verzu, si cundannatu!

U mundu oji e fattu ppi ri spiarti,
chi du fricari u populu, si su mparati l'arti.
Sudari u pani è na fissiria,
adatta sulu ari fissa cum'attia!

Cuami finiscia ia u ttu sacciu diri,
sacciu sulu ca sempri bona u nni pò jiri.
Si tutti ricogghjanu e nuddru simina,
ancunu juarnu vida ca finiscia ra farina.

Chjcati juncu, ca passa ra chjna!

Chistu è u paisi duvi si perda tuttu,
duvi i fissa sunu miagghjiu i tia,
u paisi i mi ncrisciu e mindi futtu
ed ogni cosa e sempri fissiria.

e si ndi vò sapiri natra i cchiù,
chissu è ru paisi i scinda e fallu tu;
nu paisi disgraziatu:
ne d'iacuntiantu, ne tu... cunsulatu.

Nu populu,
mintitilu n' catini,
spojjiatilu,
mbuddraticci  a vucca,
e' ancora libiru.

TCacciaticci u lavuruo,
u passapuartu,
a tavula dovi mancia,
u liattuo duvi dorma
è ancora riccuo.

Nu populu,
diventa poviru e siarvu
quando cci arrobanu a lingua
avuta i di patri:
è piarsu ppi sempri.

Diventa poviru e siarvu
quando i di paroli u nescianu paroli
e si manciano tra iddri.

Me ndi addugnu mo,
mentre ca accuardu a catarra i du dialettu
ca perda na corda u jiuarnu.

Quantu su beddri si santamarisi
Ca t’apiranu a porta e dicianu… trasa
Pua ti dimandanu si tiani turnisti
E s’un di tiani ti chiudano fora.

Santamarisi, cori d’amuri,
toccacci a tasca
e sianti i duluri.

Fimmini di San Mauru, cori ‘ngrati,
qual è la carità chi vua faciti,
nu pocu i d’acqua nun ci la dunati,
muriri di la siti ndi faciti.

Santamarisi, cori....

U vvi circamu, no, ciantu ducati,
nemmeno ncuna cosa cu d’aviti,
ma vi circamu e vua, u ccia nigati,
na supprissata e nu bicchieri i vinu.

Santamarisi, cori ....